Hesus Ng Aking Buhay

Arnel Aquino, SJ

Sikat ng umaga, buhos ng ulan, simoy ng dapithapon, sinag ng buwan.
Batis na malinaw, dagat na bughaw.
Gayon ang Panginoon kong Hesus ng aking buhay.

Saan man ako bumaling, Ika’y naroon.
Tumalikod man sa ‘Yo dakilang pag-ibig mo
Sa akin tatawag at magpapaalalang
Ako’y 'Yong ginigiliw  at siyang itatapat sa puso.

Tinig ng kaibigan, oyayi ng ina; pangarap ng ulila, bisig ng dukha.
Ilaw ng may takot, ginhawa ng aba.
Gayon ang Panginoon kong Hesus ng aking buhay.

Saan man ako bumaling, Ika’y naroon.
Tumalikod man sa ‘Yo, dakilang pag-ibig mo
Sa akin tatawag at magpapaalalang
Ako’y 'Yong ginigiliw at s'yang itatapat sa puso.

Hesus na Aking Kapatid

Eddie Hontiveros, SJ

Hesus na aking kapatid sa lupa nami'y bumalik:
Iyong mukha'y ibang-iba, hindi Kita nakikilala

Koro:
Tulutan Mo'ng aking mata mamulat sa katotohanan:
Ikaw, Poon, makikilala sa taong mapagkumbaba

Hesus na aking kapatid, putikin man ang 'Yong sapin,
Punit-punit ang 'Yong damit, nawa Ika'y mapasa-akin.

Hesus na aking kapatid, sa bukid ka nagtatanim,
o sa palengke rin naman, Ikaw ay naghahanap-buhay.

Koda:
Tulutan Mo'ng aking mata mamulat sa katotohanan:
Ikaw, Poon, makikilala, Ikaw, Poon, makikilala,
Ikaw, Poon, makikilala sa taong mapagkumbaba.